Tensioni i lartë, pas rezultateve negative në këtë kampionat të Partizanit, ka përfshirë sot në Kukës edhe Sulejman Starovën. I rikthyeri për të disatën herë si trajner i të kuqve nuk e ka kapërdirë dot penalltinë e akorduar nga kryesori Andi Koci për kampionët në fuqi, në minutën e 8-të, ndaj ka protestuar ashpër, duke dalë edhe nga zona e tij dhe kapur për krahu njërin nga anësorët, që e kishte afër stolit. Ka ndërhyrë gjyqtari i katërt, duke evituar përplasjen fizike, teksa “Bobi” ishte tejet i irrituar.
Nuk ka toleruar kryesori Koci, që ka treguar kartonin e kuq për trajnerin kryeqytetas, i cili është detyruar ta përcjellë pjesën në vazhdim të lojës jo nga pankina. Ndërkohë, në tribunën VIP të stadiumit kuksian është parë, në krah të Safet Gjicit, edhe Olsi Rama, vëllai i kryeministrit shqiptar. Ai ka qenë shumicën e kohës me celular në dorë, duke këmbyer mesazhe, tashmë në rolin e drejtorit të përgjithshëm të të kuqve. Nuk ka munguar në Kukës as Lucciano Moxhi dhe drejtori sportib, Preitti.
